Dr Vortrag ir füfte Klass? Ir Nacht vorhär. D Abschlussarbeit ar Uni? Ke Zyt meh zum düreläse! D Amäudig a d Hochzyt? Zwo Minute vor Mitternacht! Dr Zug nach Thun? Sekunde bevor er abfahrt!
I kennes. Ufschiebe. Abwarte. Öppis anders mache. Grümschele – us de glch gäng im Hingerchof mit sech umetrage. Aber es längt ja no, mir hei ja no Zyt. Immer weniger zwar, aber immer no gnue.
Immer dä letscht Momänt.
Mir chöi nüt derfür. Es ligt i de Gen. I üser Familie ischs gang u gäbe gsi, dass me bis zum letschte Momänt wartet. D Tante Greti. Dr Martin. O d Margret. U o bi Meiers heigs so Spezialischte gha. Zum Bischpiu dr Mäxu, wo einisch z Thun z spät uf ds Schiff isch cho u vom Ufer uf ds fahrende Schiff gumpet isch.
Dä cheibe letscht Momänt.
O jitz, woni doch eigentlech scho lengscht sött pfuuse, schribeni no immer a dene Zile. I dänke u fiele, i tippe u verwirfe, hirne u lide – u gibe uf.
U d Pointe?
Für die, ja für die hets leider nümme glängt.
