Ds Protokoll vor letschte Versammlig sigi somit gnämiget. Eistimmig. Är danki derfür, de chönni me jitz nämlech zügig witerfahre. Aus nächschts grad mit em Thema: „Ordnung im Treppenhaus“.
Es sigim zu Ohre cho – u das vo verschiedener Site -, es sigim auso zu Ohre cho, dass uf de Gäng immer meh Grümpu umestöii. Schue, Trottinett, Chinderwäge, Schuumstoffschuttbaue, Porzellanchatze, lääri Harasse, voui Bluemetöpf, Sandeliförmli, Ichoufswägeli, Tennisschleger, Wöschständer, Frässnäpf und Sprützchanne. U jitz heig öpper sogar es Biud ufghänkt. Es Biud.
Är verstöii das ja, er verstöiis sogar guet. Es sigi haut scho gäbig, sones Stägehuus, regurächt iladend. Und es sigi ja o nid eso, dasses ihn persönlech würdi störe. Nei, steuet nech o vor. O är ziehi bi sich deheim d Schue o es ungrads Mau vor dr Türen ab, zum Bischpiu wes rägnet. Aber sini Meinig spili hie haut e ke Roue, hie, i däm Huus, hie gäuti z Reglemänt. U a das heige sech aui z haute. Usnahmslos. Es giengi hie jitz o nid drum, mit em Finger uf öpperen ds zeige. Aber är würde doch die beide Parteie, wos beträffi bitte, au ihri Sache im Stägehuus bis Ändi Monet wägzruume. O z Biud.
U wener doch grad derbi sigi:
Är heigi ghört, dr Haag bi dr einte Partei, är sägi jitz äxtra nid weli, die wos beträffi, wüssis de scho, äber dr Haag sigi a diverse Steue sibe Santimeter z läng u d Loubhüüfe im Garte en optischi Zuemuetig. U di lääre Züguschachtle, die ghöri de o nid i Veloruum. U dr Graniumchischtli o nid. Für das sige d Chäuere da. U d Parkplätz, die ghöri usschliesslech de Outos, die Wärchzüügchischte, wo sit Wuche uf Platz zummer 40 stöii, heigi dört nüt verlore. Es chämi o immer wieder vor, dass öpper d Türe zum Ghüderrüümli nid gspliessli. Das sött nümm passiere, me wöui ja nid, dass da jede sis Züüg chönni cho entsorge. U bitte, bitte keni farbige Tüecher uf de Baukön ufhänke, gemäss Reglemänt sige nume Store erloubt. U dä Banner, wo ufne Abstimmig härewiisi, das sigi problematisch, fasch e chly z politisch für sy Gschmack.
Das wäri gloubi aues gsi. Nei einPunkt heiger no vergässe: Es sigi verschidentlech dr Wunsch güsseret worde, ds gmüetleche Zämesy e chly z fördere. U zwar mitemne Huusfescht. Jede u jedi bringt öppis für ds Buffet mit. Wes rägnet, de chönni me de das ja im Stägehuus ufsteue.
