Är het so schön usgseh. Ufem Biudli im Internet. Filigran. Elegant. Schnörkulos. Drum heisi ne bsteut.
U jitz steit är da. Zmitts im Wohnzimmer. Drei Stund heisi gha fürne zämezboue. Drei Stund, wo si a der Aleitig verzwiiflet si, sech immer wieder zämegschtuuchet hei u vor auem gschwitzt hei, wie bim ne Tennismätsch. Drei Stund. U jitz steit är auso da, zmitts im Wohnzimmer. Am schönschte Ruum vor Wohnig.
Dr Ruumtrenner.
Är nimmt sini Funktion wahr. Trennt dr Ruum, dr schönscht vor ganze Wohnig, i zwo Wäute. Dervor ds Familiezimmer, mit em Sofa, de Chüssi, wo nid aui zämepasse, em Fernseh, de Büecher u de Spili. Derhinder ds Arbeitszimmer mit em Pult us Eicheholz, em Computer, di vilen Ordner, em Drucker, emene Stapu mit zaute Rächnige. Vorne d Fröid, hinde ds Ärnscht vom Läbe. Vorne Chaos, hinde Ornig. Im schönschte Ruum vor Wohnig.
Si sitze ufem Sofa, dr Fernseh louft. Si luege nid ufe Biudschirm.
Är: «Gfaut är dir? »
Si: «Nei. U dir?»
Är: «Überhoupt nid.»
Dr Ruum lat sech nid la trenne.
U ds Läbe scho grad gar nid.
