Mou. Mou, si heigi sech schnäu igläbt. Es sigi schön, heig si sech so problemlos i das Team igfüegt. Das sigi nid säubverständlech. Nei. Gar nid. Mit ihrer luschtige Art tüeg si däm Team guet, bringi nöii Impulse. Si heigi so öppis, ja wie chönni me däm ächt säge, so öppis, ja scho fasch e chly unschuldigs, unverbruuchts. Mou, das tüegi am Klima guet. Es sigi chly wermer worde. U schaffe, ja schaffe, das tüeg si o guet. Si sigi intressiert. Kreativ. U visionär. Das sige ja nid aui, das aber nume e Bemerkig i Chlammere. Das müessi si für sich bhaute, es gäb de süsch ds Rede. Aber si sigi ja loyau. Das heig si sofort gmerkt. Ja, u begeischterigsfähig sig si o. U si heig e schnäui Uffassigsgab. Wie si sech i das Dossier igschaffet heig, das sigi auso scho idrücklech. Das sigi nid säubverständlech. Schnäu sig si o, wahnsinnig schnäu, ömu denn, wenns de drum gieng.
U säubständig.
Säubständig.
